肥姐小食店

營業中

休息中

兩日前又再出旺角，上次只影到個招牌，今次搵到個好位，連個改良咗嘅紙兜都影埋，雖然可能有機會出意外（前面位姐姐萬一向後一褪，咁就大件事啦😱），但總算有驚無險，順利完成拍攝。🤠新設計唔只比較乾淨俐落，而且仲方便拍攝呢！今次叫咗我以往食開嘅大生腸，細生腸及豬膶，承惠$35。我點嘅時候，要求要少芥辣嘅，但唔知個事頭婆新抱（肥姐個新抱，我點知係佢？咁出名嘅名店，肥姐同佢新抱又點會無接受大大小小傳媒嘅訪問呀？接受得傳媒訪問，又點少得出埋佢哋個樣呢？）唔知係聽錯定唔記得，臨畀我之前，仲唧多少少芥辣上去，變成依家咁。😠大生腸同細生腸，同樣保持到水準，爽口無胛味，但大生腸嘅厚度比以前食開嘅好似薄咗，抑或我已經食到唔記得第一次食大生腸嘅味道？今次體驗最大問題出現起豬膶度，以往食嘅豬膶，熟得嚟軟身，咬落好香，超好食（呢個味道我肯定無記錯），但呢次食落就有啲硬，應該係煮得過熟，唔知會唔會同肥姐放手畀佢新抱主理，功夫未到家有關？我諗我下次都會試多次，睇吓佢哋係一時失手，抑或都仲係咁嘅口感，係依家嘅口感的話，會轉其他嘢，唔再食豬膶。至於生腸，因為係我至愛之一（大細都係，尤其是大生腸），唔會轉啦！