利小館 (已結業)

同屋企人食飯唔使擇日嘅，只不過有D食店其實又要有藉口先會入去食，就好似呢間咁……首先要講嘅係，佢可以用WeChat落單，有95折，用銀聯咭找數再95折，如果你仲係樓上或隔離屋院住，有住戶咭再9折。哈哈!講番食! 事關佢碟碟都細細碟，所以可以叫多幾款餸試下。阿媽話已經冇乜邊度有白雲鳳爪食，所以佢一見到呢度有就第一時間話要叫黎食。跟住有砂窩雲吞雞，雲吞皮好滑，個湯好甜，舊雞煲完都仲有D味，唔會好"鞋"。蝦醬芥蘭炒爽肉D蝦醬炒得唔多均勻，有D 好鹹有D就啱未，所謂爽肉係豬頸肉，堅係爽。梨山醬汁排骨煲個醬都幾"傑"身，少少甜味但唔膩，反而我覺得D豬肉偏瘦，料頭除左有薑蔥蒜仲有2舊薯仔。金蒜乾貝蛋白炒飯炒得幾爽身，飯粒粒分明，食到底個碟冇油，幾好。鐵板風味比目魚粒好好味，佢首先煎香咗嚿魚，再加番個汁，香口又好味。椒鹽魷魚鬚唔覺有椒鹽，個炸粉漿係鬆身嗰隻，唔係脆硬果隻，只食到魷魚本身嘅爽同甜。芒果布甸D芒果味好濃，都算滑。栗蓉西米焗布甸，估佢唔倒又幾好食喎，栗蓉食食下都會食得到栗子粒，唔係超甜果隻， 熱辣辣，正!楊枝甘露又係超多芒果肉，唔錯!最美中不足嘅係叫左七味豆腐點知話賣晒，冇得食。