立体派拉麵 (威靈頓街)

營業中

休息中

從來冇試過係香港食拉麵食到成肚氣。一開始落單嘅時候白色衫店員態度已經好麻麻，問我哋要咩小食，我先生客氣表示睇一睇先決定，店員頭也不回就走咗，個表情好冷漠甚至有些黑面，當時仲以為自己諗多咗。之後麵仲未上嘅時候單獨上咗叉燒，同隔離檯比較形狀完全唔同，size都細好多。我同先生商量後決定問下店員，因為實在無法接受兩張檯明明叫咗同一碗麵，人哋塊叉燒食咗幾塊，仲多過我哋啱啱上嗰碟，仲要大半都係得肥膏？我哋禮貌詢問，係咪因爲跟餐，所以size唔同。店員回答表示，是師傅隨意夾，每塊size有不同。我哋表示我哋不太喜歡太肥，詢問可否換一換，店員再次表示係師傅夾，無嘢可以做。我哋好聲好氣話，既然係師傅夾，可唔可以叫師傅出嚟同我哋溝通下。白色衫店員再次過嚟，黑面，重複另一位店員的說話，係師傅夾，叉燒有大細好正常。我先生見她態度差，簡單回應：「咁你幫我換過碟。」店員繼續黑面，拎走碟叉燒就走。第二碟上嚟，明顯比較第一碟大，並且肥，肉層次分明，我哋就無再出聲。俾錢買難受，樓下茶記態度都好過佢！麵味道可以，但下次不了。