K Square 3 Grill & Bar (已結業)

Item: K Square 3 Grill & Bar
Rating: 3
Author: 奧志雷

38 食評

味道

環境

服務

衛生

抵食

521

大埔

$101-200

西式多國菜西餐廳酒吧

奧志雷

等級4

2.1K

阿爸生日飯 ﹗最初細妹話想打邊爐，左搵右搵，最終解定又係食日本野啊 ﹗我無所謂，食咩都得。早幾天已訂座，仲要做左今晚既第一位食客添，未到七點已經坐低左。首次探訪，先細味各 menu 先，已有一定慨念，開始 order。依舊依我既作風，由前菜開始，接住係刺生、壽司、湯、炸物、料理、揚物、串燒、甜品。

芝麻牛蒡漬，爽而脆，醬油已完全滲透牛蒡，一咬噴汁，味濃而不濁，沾上芝麻添點香口，作為開胃菜是不二之選，而且仲非常有益。如果有埋鮮淮山漬的話，真係雙得益彰了。

小食併盤：芥辣青瓜八爪魚，迷你八爪魚粒唔多食到，芥辣味微弱，只食到醬油味。麥粒味噌青瓜，有趣口感的配搭，爽脆夾著嚥韌，味道清淡。蘿蔔漬，勁爽多汁又夠酸，醒神醒腦使到胃口全開。

蟹子海膽蛋卷，創意菜色，接受度真係應人而異。淡口微暖蛋卷包著甜甜的雪糕，鋪上大量海膽、飛魚子及青瓜。份量十足，賣相非常吸引，不過味道及質感就強差人意，有點不融和之感。海膽甜筒，得意有趣可加分，味道就一試無妨。

三文魚子燻蛋沙律，原本用上墨魚子的，但剛巧無晒，轉用三文魚子無所謂，最主要係食燻蛋之麻。但係隻半熟蛋食不出煙粉味道，普通烚蛋黎喎。好采蛋黃味濃而甘香，配上黑醋沙律菜及咸香脆口三文魚子總算合格。

原條活笠魚刺生，一見到已隻眼發光喇 ﹗雪白魚肉泛出白裡透紅的顏色，油潤立立令，每片魚肉都被兇湧的魚脂包到實一實，真係想獨吞整條魚呢 ﹗客氣生疏，食少好多，我搶先試味。先配果醋，魚肉結實又非常嚥韌有彈力，滑嘟嘟又非常肥美，天然鮮魚甜味無可抗拒，魚脂甘香霸道，太好食啊 ﹗再黎一片，捲上芥辣豉油，將鮮味進一步提升，我極喜歡如此配搭 ﹗半條已歸我所有，食到停唔到口 ﹗

赤蝦刺生，始終比起牡丹蝦低了一級，大量蝦膏夠甘香，赤蝦肉爽彈而結實，清爽的蝦甜味。但蝦味不及牡丹蝦，而且牡丹蝦獨特的肉質無蝦能及，那種棉滑黏黏又帶爽既口感使人欲罷不能。海膽刺生，頂級馬糞海膽，不腥不嗅，香甜味美，滑滑彈彈。配青瓜味道夠清新、配紫菜味道夠香濃、配白飯味道最香甜。

鱆魟魚刺生，食完條極品笠魚後，其他魚都被比下去了。鱆魟魚比較瘦削，魚脂欠奉，所以味道都偏淡，配上芥辣豉油仍是不錯的。三文魚刺生，好甜啊 ﹗平魚不一停唔好食既，夠滑夠甜又經濟，滿足。

活赤貝刺生，依度已係係兩隻活赤貝喇，一隻只切到兩片架乍。甜美無窮，正到打冷陣，我最愛貝就係赤貝 ﹗極甜極滑，黏黏的軟棉中又帶點爽，甜味中又帶甜甘，好幸福啊。

極上吞拿魚腩刺生，非常矜貴的食材，要 $100 大元一片的啊 ﹗閃爍粉紅色可遇不可求，魚油多到滴出黎呢。用輕柔的力度將滑溜溜魚生夾到舌頭之上，一捲跣入口中 ﹗即時溶化，嘴仔好似朗過油一樣，after taste 勁過任何生蠔。甘甜無比的魚脂滲入每條齒縫、侵佔每顆味蕾，再漫延到鼻孔直上大腦，繼而震撼全身 ﹗好味極致，說不出的讚嘆，應該話好食到講唔到野呢 ﹗

三文魚壽司，我是點三文魚腩的，應該落錯單了，跟剛才的刺生併盤一樣的。帶子壽司，帶子天然甜味倘可以，但可以更好。質地棉棉滑滑黏黏的，塗上少量醬油都不錯。原條穴子壽司，已經係一條穴子架喇？細條左少少喎，而且瘦孟孟，肥美欠奉，質地乾鞋，即食貨？

鰻魚壽司，同穴子同一情況，失望。懷念隔離居食屋既自家燒白鱔柳呢，新鮮肥美大大碌香噴噴又熱騰騰 ﹗壽司飯一般質數，雖有點偏腍偏濕，不飽滿嚥韌，甜醋味道欠清爽芬芳，尚算合格。

松葉蟹柳蟹膏炒飯，質數跟心情一樣起起跌跌，突來一個驚喜 ﹗一向對日式炒飯毫無期待、毫無好感的我，居然會讚口不絕 ﹗上次讚係旭川既泡菜炒飯。蟹膏跟醬油打得火熱，融為一體再抱著飯粒，極香濃甜美，咸香帶著蟹膏甘甜，使到胃口全開 ﹗松葉蟹柳躺在乾爽飽滿飯粒之上，蟹汁從蟹柳中爆出，食得津津有味 ﹗

赤雞心串燒、雞腎串燒，大路不太特別，最緊要不要燒到過火過熟，要保持鮮嫩又要有肉汁，都做得到。雞皮串燒，鬆化軟爽脆卜卜，像薄薄薯片上加上雞油香一樣。明太子片羽燒，雞翼脹卜卜，肥美飽滿十分誘人，即刻想一啖吞落肚 ﹗香噴噴，雞皮燒得膠膠黏黏帶微滑，係我最喜歡的口感。雞肉嫩滑又多汁，雖然醃味略淡，但併湊起明太子都還錯不俗。

豚肉蘆筍卷串燒、豚肉車厘茄串燒、豚肉泡菜卷串燒，必食鐵三角豚肉卷，開卷有益，卷卷都燒得香口脆脆，襯托著卷中鮮嫩多汁的寶貝，多種味道與質感，變化多端，嚥韌爽彈咸甜酸辣撞得精采，好味道 ﹗

白鱔串燒，係您喇 ﹗剛剛先彈完穴子及鰻魚強差人意，幸好還有後著，挽回不少分數。白鱔柳熱燙燙剛剛燒起，彷彿依然聽到魚油在吱吱作響呢 ﹗咬開鱔肉，香氣飄飄，看得見白煙從肉間滲出。肥美白鱔既肉汁緊隨著白煙滴出，閃令令的肉汁啊 ﹗燒得外皮香脆，而白雪雪鱔肉就爽彈結實，鮮味出眾，無得彈 ﹗

秋葵串燒，爽爽又多汁的健康食品，強身健體，有益既食物一向味道都平平。厚切牛舌串燒，羶香宜人，牛味濃濃，爽爽的，可以再厚一點。燒羊架，極羶的羊啊，免強吞下。鹽燒三文魚水撥，澎湃的三文魚油一咬激射，甘香無窮 ﹗魚味非常之濃厚，每一口都充滿魚汁，美味。

紅豆蓉雪糕新地芝士餅，我不食甜的，家人品嚐後稱十分滿意啊。