影片
更多
2021-08-13
374 瀏覽
元朗新鮨店全店十座，正式一位難求，未知是否與某宇宙天團12+4 曾到訪有關。我們有幸book 到weekday 的dinner omakase，心情十分期待。先講結論：不是難食，但也不太突出，菜式有些舊，主廚與助手之間欠缺默契，餐廳花了過大的心思讓客人可以影靚相，比較之下花在食物方面的心思少咗。廢話少說，講吓啲嘢食，我唔會樣樣都講了，費事同其他Review撞，我講啲值得提的。第一道菜：檸檬蜜糖番薯。點解第一道菜就來番薯呢？係咪要食飽啲客？真心我食唔出檸檬和蜜糖味，番薯凍咗死實實咁，唔知邊度好食？留意吓佢在每一個吧枱位上邊放左一塊沙畫，食物再放喺沙畫上邊俾你影相，而喺每一個座位的上方仲有射燈照住，簡直猶如影樓一樣！松葉蟹拆肉，上邊淋上熱辣辣的蟹膏。呢個我覺得幾好食！好了，到咗全晚我覺得最悶最無聊(以我觀察應該唔只我咁諗)，但係餐廳方面應該覺得幾自豪嘅時候，就係切嗰舊熟成拖羅了。圖中呢位師父喺個雪櫃度拎舊嘢出嚟片東片西，又話浪費咗幾多野，又話點不惜工本，又話有幾捨得，我心諗好似係我捨得俾錢先啱。好啦，咁嗰啲好豪咁切出嚟話唔要嘅部份應該掉咗先啱(高級的日料就係要喺客人面前浪費下食材，證明只係
先講結論：不是難食，但也不太突出，菜式有些舊，主廚與助手之間欠缺默契，餐廳花了過大的心思讓客人可以影靚相，比較之下花在食物方面的心思少咗。
廢話少說，講吓啲嘢食，我唔會樣樣都講了，費事同其他Review撞，我講啲值得提的。
第一道菜：檸檬蜜糖番薯。點解第一道菜就來番薯呢？係咪要食飽啲客？真心我食唔出檸檬和蜜糖味，番薯凍咗死實實咁，唔知邊度好食？
留意吓佢在每一個吧枱位上邊放左一塊沙畫，食物再放喺沙畫上邊俾你影相，而喺每一個座位的上方仲有射燈照住，簡直猶如影樓一樣！
松葉蟹拆肉，上邊淋上熱辣辣的蟹膏。呢個我覺得幾好食！
好了，到咗全晚我覺得最悶最無聊(以我觀察應該唔只我咁諗)，但係餐廳方面應該覺得幾自豪嘅時候，就係切嗰舊熟成拖羅了。圖中呢位師父喺個雪櫃度拎舊嘢出嚟片東片西，又話浪費咗幾多野，又話點不惜工本，又話有幾捨得，我心諗好似係我捨得俾錢先啱。好啦，咁嗰啲好豪咁切出嚟話唔要嘅部份應該掉咗先啱(高級的日料就係要喺客人面前浪費下食材，證明只係俾最靚嘅部份客人食)，但係原來佢只係好豪氣咁掉咗去助手嘅砧板，助手就將佢包返好又放返落雪櫃😂😂😂。令人不禁懷疑會唔會午餐就食呢啲切出來的下欄呢？
搞咗成十幾分鐘終於第一件拖羅壽司完成了！但係當佢放喺第一位客人嘅面前之際，佢仲叫客人唔好食住，原來又係為咗影相。
等佢初好晒啲壽司放喺所有客人面前之後，又要等佢老人家逐件逐件咁喺上邊撒下鹽花，仲叫啲客用slow motion拍片，真係嘆為觀止！究竟今晚係為咗嚟食嘢定係去咗影樓我已經搞唔清楚了😂😂
咁件拖羅sushi好唔好食呢？佢疊左三層的，最上面是赤身，中間是中拖羅下邊是大拖羅。因為熟成咗所以入口即溶，但係唔覺得味道濃咗。
與其在客人面前表演切拖羅，有一啲基本野就不如做好啲，例如生蠔就應該在客人面前開啦，又衛生又會好食啲。
生蠔係幾肥美，但是預先開定，又雪到好凍，唔係好食得出鮮味，海水味就更加唔使講，其實在客人面前開生蠔是基本的吧。
這是另一個高潮位，熄晒燈在客人面前燒蠑螺。未見過的會覺得幾得意，但係應該最少十年八年前香港已經有人做，今時今日仲出呢招，有啲過時。
甜品拼盤：唔知師傅知唔知道蜜瓜已經有多少過咗造了，唔係太甜，中間嗰杯係啫喱有啲忌廉咁，黃色一條是玉子燒，呢款玉子燒做到好似布甸咁，放在甜品盆上恰如其分。
講完食嘢講吓啲軟件，師父本身不善辭令，未能同客人打成一片，好多時連介紹都冇就直接上菜，要客人問返轉頭是什麼魚，什麼材料，都幾好笑。總之大部份時間都係冷場，師傅根本唔識搞氣氛。
基本上師父是有個助手的，但係呢位助手好多時只係負責擺下碗碟，好少嘢做，又成日唔見咗人，所以九成九嘅工作都是由師傅一個人搞掂，佢又整色整水，搞好多擺盆野，咁梗係搞到一頭煙，冇乜時間與心機同客人溝通了。師父真係要同助手好好咁傾吓分配好工作，否則呢個助手直情形同虛設。
最後有個美麗的誤會，我一直以為我眼前的就是來自日本的師父，一來聽過呢間舖頭有日本師父，二來見佢肥肥矮矮，又打晒呔咁十足銀座嗰啲壽司師父，成餐飯下來又聽佢講嘢是有口音的，說着不純正的廣東話。最後臨走之前好奇問佢來自日本什麼地方，佢話其實佢係上海人，來了香港咁耐廣東話都講得唔好！食咗成晚生嘢，呢一刻真係好想同佢嗌一客回鍋肉加個白飯。😂😂😂
如果你好鍾意影相，之前又未試過鮨店omakase，我推薦你依間，作為探索美食之旅的起點，定位不宜過高。
晚餐21道菜$1680/位，份量可以。
張貼
