海宴樓 (已結業)

朕今日想食海鮮，但又唔想山長水遠去西貢同香港仔，於是就去左海宴樓呢度試下，呢度係標榜本地海鮮，仲要係優質嗰隻！朕一坐低，就問店小二有咩好野推介，小二就推左個"有氣礦泉水燉杏汁白肺湯"，吓有氣既湯，唔係啩！當然個啲湯煲完就梗係唔會仲有氣啦，不過中國人既人傳統智慧，豬肺湯以形補形，飲完就補你啲氣，碗湯飲落有好香既杏汁味，杏汁夠哂滋潤，豬肺又夠補氣，如果喺乾燥既冬天飲就最好不過啦！飲完湯，就食啲小食啦，"脆皮燒腩仔"份量還可以，不過啲皮就唔係全部都脆卜卜！跟住就有"蒜蓉蒸本港野生魷魚"，朕就唔知"本港野生"同"大陸自由行來港既野生"既魷魚睇落有咩分別，但係呢個"蒜蓉蒸本港野生魷魚"食落鮮甜，咬落爽口，加埋佢地用鴛鴦，份外香口。朕食乾瑤柱就食得多，新鮮既就好少食，呢個店小二推介"蒜蓉蒸西貢峇門野生車蠔"，車蠔即係新鮮瑤柱，肉身夠厚又大粒，佢比乾瑤柱仲多一份鮮甜味。另外"酥炸珍珠貝"，珍珠貝外皮炸得脆卜卜，咬落夠厚身，不過朕始終都係覺得海鮮都係食鮮味，如果用炸始終都係浪費左呢啲咁鮮味既食材，下次試下蒜蓉蒸，應該有不一樣的滋味！－－－－－完－－－－－