Mee...lemongrass (ac四期) (已結業)

由於工作關係，今日要係香港仔食午飯，係網上見到呢間餐廳人氣高企，當然要試試佢！鍾意食喇沙嘅我，一打開個菜單就二話不說點左蜜汁炭燒厚切豬扒喇沙。喇沙味道非常濃厚，帶少少椰汁味。辣味方面，餐廳非常細心將辣味嘅來源（辣醬）分開上，放咗喺湯匙上面，唔食得辣嘅朋友，都唔需要擔心。麵底方面，就用咗正宗嘅配搭，即係油麵加米粉，粉面嘅份量都唔少，食得過癮。終於到另一個主角上場啦！塊炭燒豬扒真係超級好食，蜜汁味都幾重，而且肉質非常嫩口，一食就食得出餐廳真係用炭燒嘅方法煮，因為只有呢個嘅方法先可以做到外皮小小脆而又保留到超多肉汁。而且豬扒旁邊會有一小碟魚露提供，點左魚露之後嘅蜜汁燒豬扒味道更加豐富，令整個餐加上一股更濃厚的東南亞風味，真係冇得彈。總括而言，雖然呢個餐都唔算平，但係以呢一個食物質素，我覺得絕對是物有所值！值得一試！