利寶閣 (已結業)

話說同朋友做完健身之後肚餓到暈，心諗邊到附近有就腳既地方可以食放題就好。跟住落到去見到有利寶閣奄仔蟹既易拉架係到，見到有任食和牛，片皮鴨同奄仔蟹，食指大動之下於是就去試下。入到去之後見到環境好寬敞，因為晚上8點過去既關係，所以人唔算特別多。入到去之後阿姐好快安排左個位俾我地坐。奄仔蟹有清蒸同鹽焗兩種，鐘意食蟹本身既鮮味可以點清蒸，想食重口味既當然就食鹽焗（無錯我只係食左一個清蒸，之後食左好幾隻鹽焗蟹）。但係最亮眼既菜色個人反而覺得係片皮鴨同咕嚕肉，片皮鴨因為係即烤即出爐既關係，表皮仍然保持十分之脆皮。另外因為片皮鴨麵皮會輪流替換既關係，所以皮唔算特別硬。 而咕嚕肉表皮酸中帶甜，爽脆得黎入面既豬肉仲係鮮嫩，無過老既跡象。至於打邊爐方面，我比較推薦食龍躉肉同和牛。龍躉肉本身肉質比較嫩，輕輕烚完之後加少少蒸魚鼓油，配搭起來十分鮮甜。而和牛烚5-10秒就已經可以起筷。 至於甜品方面就比較傳統，主要係桂花椰汁糕同綠豆沙居多。我比較推薦綠豆沙，煮得耐好「溶」。