自家味道 (已結業)

最近朋友同我講，話太子果邊新開左間唔錯既餐廳，主打原條魚同埋佢自家製既豆漿鮮魚湯底。作為好魚之人，真係忍唔住要去試下。入到去覺得環境很乾淨，雖然都係食家常便飯，但同一般茶記唔同，睇得出老闆有花個心機裝飾，唔講仲以為係間CAFÉ。不過環境再靚都無用，因為食物質素先係重點。先講呢份蒸魚餐，我地叫左黃花魚，用豉汁蒸，跟餐配埋滷肉飯及菜湯。因為即叫即蒸，所以都等左陣。一上碟就見蔥豉鋪滿面，完全唔吝嗇。而最重要係食落真係好嫩好滑，同埋絕對係新鮮魚。食開魚既人都知，冰鮮魚或隔夜魚絕對唔會有呢種口感。再講呢碗單骨雞翼米線，我揀左配支竹。先飲個湯，湯底夠熱，有香濃既魚味之餘，仲有淡淡黃豆味，呢個配搭我都係第一次試，陣味好夾，有驚喜。而雞翼因為單骨，所以食落好方便，而且整得好入味。最後我地連湯都飲埋，你係飲得出沒味精，仲要一Ｄ都唔腥。我另外再加６蚊要埋隻滷蛋，個蛋黃好漿好黏，我敢講整得好過好多所謂日本餐廳，淨係果種黏黏漿漿既口感已值回票價。另外我地都叫左份煎餃，個皮薄得黎仍然好煙韌，唔會夾散。而且煎得好甘香，作為小食一流。