心之食堂 (裝修中)

係銅鑼灣收工，同事話想食下日本野，諗起之前好似黎食過覺得幾好食所以就再黎食。我地叫左鰻魚石窩飯，牛柳粒石窩飯，芝士炸雞，火灸牛柳串，三文魚同八爪魚刺身，呢度加埋咁多野都唔洗500$ 非常抵食。首先黎既三文魚刺身好有驚喜，超級厚切又好新鮮，而八爪魚就擺得好精美，幾鮮甜下。而二個石窩飯係必叫之選，因為真係好好食。石窩飯粒粒分明，食到最後啲飯焦入晒味仲勁有口感。我個人覺得鰻魚石窩飯更好食一點，因為鰻魚味滲晒落窩飯度，勁香口，愈食愈開胃。之後到火灸牛柳串，黎到先將d牛柳著火，影唔切佢最壯觀既一面。味道方面出奇地無咩特別，可能我期望太高，反而石窩飯既牛柳粒更出色。最後黎既係芝士炸雞，啲芝士熱熔左真係超正，炸雞啲肉都幾嫩，皮都幾脆。最後悔係無襯d芝士變成一舊舊之前同d炸雞撈埋一齊，不過d芝士就咁食都好香好"芝"味。地方唔算大，但都容納到廿幾三十人，有d單車擺設幾有特色，有差電服務好細心。