意粉 360 (已結業)

呢日有要事入屯門，路過呢頭。見個午餐唔太貴，就入黎食啦。本來想食龍蝦汁海鮮石鍋飯，但我都唔知食左幾多個n次。所以就食卡邦拿算啦。忌廉湯裡面有好多蘑菇，感覺上有小小似金寶湯。但味道算唔錯既。一口豬係細細舊既豬柳，加沙律醬就好好食。卡邦拿意粉一上，就知比意粉屋既細碟。因為單買呢個意粉都係五十幾蚊，所以份量都有所調整。唔錯架味道，個芝士汁好濃，有小小蛋黃汁既感覺。雖然只係用火腿同洋蔥炒，比較簡單。但味道就出神入化，正。紅豆咖啡其實只係咖啡加紅豆，但飲落又幾好飲。唔會太甜，紅豆同咖啡既味道好襯。神奇既係，果陣卡邦拿既味道到夜晚都仲有。可想而知，個芝士味係幾濃啦。