福興素食店

營業中

休息中

一直對這家素食店好奇，好多次經過都不見它開門營業，想食都食唔到，另一次見到佢略派飯比老人家，原來初一十五都會派飯，幾有善心，更想幫襯支持下佢。終於在星期六的下午，見到開門了，原來平日收三點半，星期日唔開，怪唔之得咁難食到啦。在門外沒有放出任何餐牌，到底有咩食？好神祕。見坐滿左人，兜一個圈返黎，見有位就入座，店面無人招呼，剛好另一個食客入黎叫店員落單，我又順便叫埋。今日三餸飯有蕃茄炆豆卜，油麥炒魚片，炸魚塊，老黃瓜扁豆湯無晒，改左飲熱菜蜜。炸魚塊幾脆，當然唔係魚，亦唔似魚，唔好當佢魚咁食就ok，蕃茄豆卜味道調較酸甜恰好，油麥菜有啲黃，魚片又幾似樣，兩個餸都多汁，好送飯，飯係健康嘅十穀米，較有咬口但唔覺硬，我跟另一食客叫少飯，應該少左一半，飲品菜蜜好夠味。講真其實啲餸普通，勝在大熱天時唔駛自己身水身汗咁煮，仲送埋野飲，算幾實惠，店員都幾nice，呢頭附近無咩好食，有機會都可再支持呢間店！