汀汀烤活魚 (已結業)

踏入十二月香港終於有番個冬天, 天氣凍最好食火鍋煲仔飯暖吓身, 旺角呢間汀汀烤活魚放工經過親都好多人, 既然未食過又試吓.是日七點幾去都滿咗八九成, 一入到間舗就聞到好濃烈嘅香料味. 見到每枱都有個魚爐或者雞煲滾緊, 既然老公唔多食魚咁就叫個雞煲食吓.食完雞煲可以加上湯打邊爐, 不過怕肥膩都係叫小食算數.先上涼拌萵苣, 萵苣喺街市見得多, 食就好少. 萵苣爽口, 本身冇咩味, 涼拌之後變得酸酸辣辣, 係一個好開胃嘅小食.燒原條茄子上枱時仲以為係燒鰻魚, 佢張茄子切開放平燒, 茄子有好濃孜然味.外皮燒脆, 內裹茄子肉軟滑, 下飯一流.羔蟹雞煲上時見到表面被芫茜唐芹覆蓋著, 侍應一邊用湯殼拌勻, 一邊講雞塊得八九成熟, 建議先食較細雞塊, 大塊遲食都仲好嫩滑.雞煲叫咗小辣都越食越辣, 有好多香料配菜包括花椒八角紅蔥薑芫茜唐芹, 羔蟹走過油, 蟹羔甘香但蟹肉冇咩味, 隻雞應該係細雞, 雞皮雞塊嫩滑, 雞塊切得比較細. 其實個煲有冇蟹都冇咩所謂, 雞先係主角.叫咗白飯同燒菠蘿送雞, 食落冇咁熱氣, 中和一吓辣味.燒雞中翼相比雞塊就啖啖肉, 都係有好濃孜然味, 比譚仔土匪雞塊更濃孜然味.食完餐飯