元札幌拉麵 (宇晴軒商場) (已結業)

今日要帶小豆丁學嘢， 學完已經到中午要醫下個肚。 小豆丁見到咁大隻叮噹,( 出賣咗我年齡 多啦a夢至真) 立即吸引咗過去。再望下menu，星期日都有定食套餐， 就決定入去試。餐廳嘅裝修都好日本風， 座位寬敞， 冷氣同服務都好好， 見到有小朋友就主動派上唔同公仔嘅餐具， 一家大細去食都好舒適。一大一小叫兩個餐一定食唔曬， 通常都係叫一個餐加小食， 但呢度就比較多配搭， 我叫咗一個叉燒拉麵加咖喱飯， 都係78蚊， 加埋樽裝汽水多5蚊， 呢個份量真係非常理想。叉燒拉麵裏面都有五六塊叉燒， 叉燒肥瘦均勻，唔鍾意食肉嘅我就嫌多， 麵我就覺得適中， 湯底偏濃， 食落去略為咸， 食完飲埋支可樂就啱啱好。至於過咖哩飯就非常之啱小豆丁食， 味道唔辣，份量小小地。我埋單走嘅時候 ，老闆仲叫小豆丁揀番一份小禮物， 正所謂物輕情意重， 小朋友離開嘅時候都好開心， 講到明下次要再嚟， 真係皆大歡喜。