越興園越南菜館 (已搬遷) 新店位置

越興園，又一間黃嘅老店，以前喺豉油街嘅舊舖留低咗唔少腳毛😆，最鍾意食佢哋嘅蒜蓉牛油雞翼。自從多年前搬咗嚟通菜街之後，就一直都冇再幫襯，始終香港嘅越南餐廳選擇越嚟越多，而我又越嚟越貪新厭舊😆。今晚再幫襯，畀我最大嘅感覺係：地方大咗（有兩層）企理咗，職員平均後生咗，仲超級有禮貌，講每句說話都多謝前多謝後，老店嚟講，非常罕有👍。叫咗碗我至愛嘅生牛河粉配鹹檸七，河粉大大碗，粉嘅份量好多，其餘嘅配料除咗牛肉外，仲有芽菜，洋蔥同蔥粒，味道平實穩陣，湯底清甜不膩，啪一啖粉，再呷一口湯，都幾滋味😋。