麻辣娘子 (形薈) (已結業)

形薈開咗好多間店，淨係食過薩莉亞。今次揀咗呢間川菜食，唔係好大期望， 所以有驚喜。今日星期六去到已經接近七點，全場爆滿。 我帶住八十歲嘅媽媽去食， 入面有位著西裝但係冇名牌嘅肥肥哋男士，唔知係唔係經理呢？ 佢即刻攞咗張凳比我媽媽坐住等，好好人。一間餐廳只要唔太難食，服務好，一定會有回頭客。我哋叫咗辣子雞，毛血旺，川椒皮蛋，最後再加多一碟避風塘炒麵。另外可以喺佢哋門口買嘢飲，第一杯正價第二杯半價， 我哋叫咗兩杯水果茶，合共47蚊。辣子雞（中辣）唔辣，雞件太大舊，唔係太夠味。川式皮蛋，好味，皮蛋好靚。毛血旺，正宗四川毛血旺， 有魷魚、萵筍、大豆芽、午餐肉、牛柏葉、雲耳、鴨血。 適合香港人嘅口味，我覺得可以重味啲。最後叫咗碟避風塘炒麵， 味道幾好，可惜炒得濕咗少少，如果炒得乾身啲會更加好。本來仲想叫多個紅糖糍粑，但因我哋實在太飽，留番下次。