新翠雅茶餐廳

營業中

休息中

好奇怪，呢間舖已經幫襯過好幾次，幾好食，但食評小得可憐…今次又同屋企人黎光顧，一行4人…由於有人訂枱，坐低限食90mins………但係呢間野手快腳快，45MIN都食完啦。大排檔式經營，大家就唔好講衛生同服務啦！生炒骨係我最愛小菜之一，基本做中菜既都有做，但要炸得好就唔係間間得，兼且好多地方要香口兼慳皮，一係粉多過骨，一係肥肉多，瘦肉少！呢間D肉排2成肥、8成瘦，茄汁唔太酸，味道岩岩好，正！排骨滑雞煲仔飯, 天寒地凍，煲仔飯肉多過飯，雞肉香滑，排骨得兩舊，未食清楚。飯粒乾身，吸收左雞味，開胃！不過想食飯焦就無啦…唯一投訴就係少左少少飯，唔夠皮。琵琶豆腐，外皮香脆，份量唔少，白菜墊底，但係個稠汁就真係好鼻涕下…砂鍋魚頭，大牌檔，都唔會慢慢執碼，唔好彩，呢鍋無咩魚肉食，燒肉多過魚肉…不過反而配角豆腐好香好滑又好食，補補數。上湯豆苗正路，無咩值得寫…不過竹笙好多，唔錯！其實早兩次黎食海鮮，都好正，可以街市買完帶黎整，手勢唔錯。