聯邦皇宮 (已結業)

由於好耐都無同一對好朋友見面，所以今日我們約咗他們一齊去油麻地嘅「聯邦皇宮」飲中午茶！由於他們最近去過睇牙醫，所以今日我們叫嘅都係以魚類為主！我們叫咗蜜味叉燒腸外層嘅腸粉好軟滑，入面嘅叉燒肉質都幾鬆軟，味道都幾香甜！京式叉燒包嘅包質比較煙韌，但都算軟熟，蜜汁嘅味道好香甜！晶瑩蝦餃皇嘅餃皮雖然好薄身，但可能蒸到有啲過火，所以質感比較「嚡」，而入面嘅蝦肉亦都係比較「老」！帶子菜苗餃嘅餃皮都幾煙煙韌韌，菜苗都幾清嫩，但味道就比較淡！雲勝龍躉球泡米線嘅龍躉球表面有輕輕煎過，所以味道好芳香，肉質好結實彈牙，而且份量十足，真係幾抵食！滑蛋星斑球炒河嘅河粉好煙韌軟滑，星斑球嘅肉質相當爽甜彈牙，份量亦都係好足料，真係超抵食呀，再加埋啲滑蛋一齊，令到色澤賣相非常吸引！蟹子燒賣皇嘅肉質都幾爽滑，而且肉汁都幾多，唔會好乾好硬！鮮竹牛肉球嘅肉質好鮮嫩，牛肉味都幾香濃！剁椒蒸魚雲亦都係蒸到有啲過火，所以肉質有啲「嚡」，大香辣嘅剁椒味，令到味道更加鮮味！