Meltlyplace (已結業)

每年咁多人生日食蛋糕都食到悶，食嚟食去都係果幾樣，唔係芝士蛋糕就係朱古力蛋糕。最近同事生日諗買咩蛋糕都好煩惱，皆因佢好揀飲擇食既。而且我哋係中環半山返工，附近基本上係冇選擇，就得嗰兩間蛋糕/麵包店有得買，咁就上網睇下佢有啲咩蛋糕啦！點知⋯⋯粟米⋯⋯蛋糕⋯⋯粟米蛋糕？咁健康食材，用來做蛋糕？真係未試過亦都冇諗過會有粟米嘅蛋糕。粟米蛋糕外觀睇上去很白雪雪，上面仲有啲粟米圍左個圓圈，好過癮。切開個蛋糕之後原來入邊真係都仲有粟米粒粒，十分驚喜，未切完個蛋糕個個都好想試食啦！放入口第一下感覺係冰冰涼涼的慕斯加上脆脆的餅底，幾秒之後⋯⋯一陣陣嘅粟米味係個口到散發出嚟，感覺好神奇，充滿奇妙嘅錯亂咁。到底食緊粟米定係蛋糕？再食落去，就覺得個蛋糕有點甜⋯⋯好點⋯⋯太甜。如果你生日想有啲驚喜又有啲特別的味覺經驗，粟米蛋糕真係不妨一試。