利星火鍋海鮮小炒

營業中

休息中

訂位嘅時候已經預訂咗杏汁白費湯，開頭都驚飲唔晒，因為我哋只有六個人，不過原來佢有細size所以就有口福，非常足料，啲湯渣多到嚇死你，又多豬肺，個湯煲得好靚。琵琶豆腐味道都唔錯，個汁落咗落去又唔會令到個豆腐林晒。生炒排骨就正常火星，不過都算大碟嘅。雞蛋焗魚腸聽講係必食嘅，洗得乾淨，冇苦味，魚腸都算多，邪惡啲都值得嘅。等齊人嘅時候侍應哥哥問我哋要唔要預留燒鵝，咁我哋就要咗一份例牌，真係好食喎，皮脆肉滑，而且又唔會好肥。美中不足嘅係原先想食肉絲炒麵，因為呢個聽講又係必食嘅，可惜侍應哥哥話冇晒麵叫我哋改做米粉得唔得，一心諗住係肉絲炒米粉，點知嚟咗碗湯米粉加條菜，呢件事我哋都覺得好搞笑。