利寶閣 (已結業)

自助餐或放題食得多，但純粹廣東菜式放題都係第一次嘗試。 早幾日，同朋友好到尖沙咀利寶閣食咗一次粵菜放題，不單好味，而且任點任食兩小時，收費大眾化，服務又好，超值！每人一盅極上佛跳牆，成隻飽魚喺裏面，湯甜滋味、內餡滿瀉，非一般將就行貨，食到舔舔脷！上湯焗大虎蝦天使麵嘅虎蝦夠大隻，極有蝦味、煙韌彈牙。之後其他嘢都係任點任食👍🏻。片皮鴨唔係隨便俾你，而係當面切，新鮮熱辣、皮爽香脆、肉汁豐腴。雞蛋豬腳薑份量十足，酸酸甜甜；咸菜胡椒豬肚，清新甘香好味；石歧乳鴿啖啖肉，很鮮嫩，食落半點黏牙嘅感覺都無；燒肉是五層腩肉、肥瘦適中、皮脆香口，正！仲有燒牛扒、切雞⋯⋯款式應有盡有，食到半途，已經飽到上心口，但因為太好味，所以繼續作戰。 最後，點咗蛋白杏仁茶、楊枝甘露和榴槤布甸等甜品，都非常有水準！