糖百府 (已結業)

上星期日下午行經吳松街糖百府，被門口海報吸引入去試佢哋响舊年食神爭霸戰得獎作品——杏仁秋香（杏仁雪花冰），材料有杏仁雪榚、芒果粒、黑珍珠、百香果魔豆，再淋上芒果糖漿同黑芝麻。雪花冰唔似冰，一D都唔硬，屬於另一種形態嘅雪榚，入囗即溶，仲有淡淡的杏仁味。 本身唔太甜，同外面嘅芒果糖漿剛好相反，但係糖漿嘅勁甜同芒果酸味非但無搶味，反而令原來的味道更豐富，更醒神。芒果粒唔算多，但係D百香果魔豆就非常特別，口感就好似魚子咁，裡面居然係果汁味嘅液體，係咪份子料理呢？黑珍珠配奶類食品幾時都咁夾，反而黑芝麻就可有可無。總括來講，杏仁秋香的確有佢嘅賣點。（一）味道有層次：先是淡淡的杏仁味，再是突襲的芒果勁酸、甜味，最後是鮮芒果的清新，更莫說獨特的魔豆果香……（二）口感大不同：雪花冰的綿，黑珍珠的靱，魔豆的爆漿……攞獎有道理，不過價錢（$35）就有向下調整嘅空間！