彩福欣宴 (已結業)

師傅前前後後都黎左呢食店幾次, 但點解都仲未有食評呢? 皆因師傅次次都諗住映埋相先寫, 可惜次次都掛住食所以唔記得左, 而今次都係冇映, 不過著實想分享下, 所以希望能夠淨係用文字都可以引起大家嘅共鳴啦!是晚一行四人就黎左呢間食店度食晚飯, 全程由師傅發板, 於是乎三餸一湯又點少得, 問一問個伙計有咩正湯? 於是就介紹左龍利葉木瓜煲雞腳湯, 再柯打左呢度頗出名嘅鹽焗雞一隻, 魚肉釀茄子, 金銀蛋浸豆苗, 再加多一碟生炒糯米飯!先講下個龍利葉木瓜煲雞腳湯, 湯底煲得好夠火喉, 味道清甜, 夠晒滋潤, 係咸左少少同埋帶少少肥啦, 如果再淡少少就仲正, 一煲湯分到六碗, 所以絕對夠飲; 鹽焗雞係一個砂煲上, 皮香脆肉身滑, 一d都唔韌, 加上味道唔會過咸, 啱晒師傅呢d鍾意食滑雞嘅人, 正呀!魚肉釀茄子賣相比較特別, 係兩隻茄子成條上, 面頭釀上魚肉, 而碟邊伴上西蘭花, 上枱後伙計先幫手剪開, 茄子釀得幾腍, 而魚肉亦唔算多骨, 個汁亦十分好味, 至於伴碟嘅西蘭花亦係一絕, 西蘭花爽口得黎又唔硬, 加上非常嫩綠, 十分好味; 最後金銀蛋浸豆苗亦不賴, 豆苗新鮮兼嫩綠, 一d都唔老, 勁正!