素食媽咪 (已易手) 新餐廳

素食媽咪返黎喇！本來喺太子既素食媽咪搬左去荃灣之後就冇再食過，依家佢地又返番九龍區，終於有機會再黎食。因為疫情關係鋪頭只可以坐一半人，所以都要等一陣先入到座。等既地方冇瓦遮頭，天氣熱既時候都幾辛苦，唯有用念力叫啲食客食完快啲埋單走人。埋位見到個個都嗌紫豆卷薯餅，唔執輸心態都叫左黎試。個卷同薯餅都炸得香脆，但又唔會油膩，加埋個sauce食到人lam lam脷。紫豆卷得三舊實在太少，起碼要double先可以過足口癮。媽咪米卷用米紙包住蘿蔔、豆芽、素鴨同芒果，味道非常清新，芒果係有畫龍點睛既效果，夏天食一流。韓式拌綠茶冷麵配上自家制泡菜，陣辣味慢慢滲出黎，越食越辣，自問唔佷得辣記得拎定杯水。除左一般堂食，素食媽咪都會整盆菜架。一班人聚會果陣可以考慮下訂佢地盆菜，味道冇傳統果啲咁濃，適合鐘意清淡啲既朋友。