熊拉麵 (白加士街)

營業中

休息中

話說Mr.J上次同我食完後大讚炙燒肥叉燒勁好味，但無比我試，自此我一直耿耿於懷，好想試下熊拉麵嘅肥叉。今日大約1點半嚟到，我揀咗期間限定嘅廣島蠔豚骨湯拉麵，好肚餓嘅Mr.J就叫咗超級巨熊拉麵。桌上配菜依度係飲冰水㗎，如果你想飲暖水或熱水，可問店員。先講我個廣島蠔豚骨湯拉麵，有兩隻廣島蠔同一塊炙燒肥叉燒，兩隻蠔都好飽滿幾大隻，幾好食。期待已久嘅炙燒肥叉燒好大塊好厚，但唔會超肥，其中一面輕輕地燒過，食落口唔油膩，有輕微嘅炙燒味道，再加上豚骨湯嘅味道，Mr.J果然無介紹錯，真係超級好味。拉麵煮得啱啱好，湯底夠熱唔太鹹唔太油無味精，飲落骨膠質好重，整體份量適中，我好滿意。Mr.J個超級巨熊拉麵，份量認真多，有四塊紫菜、一塊炙燒肥叉燒、兩三塊普通叉燒、一隻無切開嘅糖心蛋，整體上都很好，Mr.J食完表示勁飽。同Mr.J喺香港食過好多間拉麵店，熊拉麵絕對係我哋兩個會再次光顧嘅拉麵店之一。