譽宴 (已結業)

Item: 譽宴
Rating: 3
Author: 奧志雷

U-Banquet

3.5

21 食評

味道

環境

服務

衛生

抵食

415

佐敦

$101-200

粵菜 (廣東) 火鍋點心酒樓

奧志雷

等級4

2.1K

都係嗰句，恭喜晒 ﹗行程緊密！粉嶺長華邨、鶴藪水塘、大埔鳳園、三門仔、上水、大埔、佐敦，今晚飲完再大埔最後上水，睏死我咩！羅生羅太美酒佳餚，鴻運乳豬全體、碧綠蚌片蝦仁、銀湖蟹肉雙翡翠、黃金鵝肝海螺酥、紅燒竹笙雞絲翅、生扣南非原隻鮮鮑魚、清蒸大海石斑、一品脆香燒雞、湯州炒飯、干燒伊麵、百年好合、甜甜蜜蜜。

一年前都係依個場飲喜宴，內籠無變，連菜單都係大同小異。食野要緊，唔飲酒比較安全，整壼鐵觀音先。阿姐勁聞塞囉，我都話要鐵觀音咯，係都要比潽洱我 ﹗都叫您成壼茶放低咯，係都要攞走，唔通我次次叫您埋黎酙咁麻煩咩 ﹗激鬼死 ﹗好采最尾都換返鐵觀音成壼放係我面前，一早叫您地咁做架啦 ﹗

不飲不飲還需飲，好啦 ﹗好啦 ﹗飲一杯好喇，飲勝 ﹗一開始就停唔到啦，一二三四五六七杯 ﹗叫左您地唔好迫我咯。羅生羅太簽完結婚證書，祝埋酒就可以開飯喇 ﹗請大力鼓掌 ﹗

鴻運乳豬全體，今日我地依枱坐無虛席，坐足 12 位食家呢 ﹗仲想貪心食多幾份添，哈哈。今次依隻豬得喎 ﹗身材好 fit，三層 layer 清晰可見又平均，脆皮、滑膏、瘦肉，各自各精采，瘦肉豬肉味濃，咸香清爽不混濁，好味 ﹗

碧綠蚌片蝦仁，上次係西蘭花蝦球珊瑚蚌，今次換黎蜜糖豆蝦球蚌片，顏色鮮艷奪目，賣相吸引，仲香噴噴添，讚 ﹗我食野就最唔客氣架喇，黎招連環拳，每款夾幾舊先。蝦肉好爽甜又新鮮呢，好開心啊 ﹗蚌片就好腍，不過帶淡淡海螺味，都滿意。蜜糖豆非常爽甜多汁，食到索索聲。我都係近年先開始食到甜椒架乍，以前覺得太重草青味食唔到，依家就覺得爽甜清新好味道囉。

銀湖蟹肉雙翡翠，銀湖？真係估唔到會係咩黎，原來係蛋白花呢。始終拆解唔到咩係雙翡翠，都係得西蘭花乍喎，應該打錯字啫。草菇雖然係罐頭貨，但處理得宜無澀味，仲甜美多汁菇味濃。西蘭花脆卜卜又爽口，混上鮮甜蟹肉芡非常冶味啊 ﹗

黃金鵝肝海螺酥，似乎食材跟海螺無咩關係，應該係個外觀捲到似海螺啫，我起個名為千絲鵝肝卷囉。創意同外觀都滿分，但味道上就差左少少，整個口感都非常乾燥，味道又非常單調帶油膩，鵝肝味好弱，完全食唔到，配返個醒胃帶酸既汁會更好。

紅燒竹笙雞絲翅，食翅係無需加醋架呢，醋只係食完用作解解膠質啫。湯底香濃，啖啖都有料，雞絲翅針掛上大量高湯衝入口，美味極了 ﹗爽呀 ﹗食完呷啖醋，舒服晒 ﹗

生扣南非原隻鮮鮑魚，又有鮑魚食喇，梗係要成隻咬先夠豪氣啦，用刀切會破壞左佢既質感及影響味道架 ﹗狠狠地咬啖先，好鮮啊 ﹗蠔汁扣得入味，鮑肉彈彈的，一啖未食完已經想咬下一啖喇，好好味 ﹗新鮮爽嫩生菜撞上鮑魚蠔汁點會唔好食呀 ﹗仲要大大啖不停地塞入口添呀 ﹗

清蒸大海石斑，有朋友仔已經食飽，咁我可以全力開動喇 ﹗大量魚肉撈上蒸肉豉油掃入口，大滿足 ﹗魚肉結實帶點滑，魚骨魚尾魚鰭無一幸免，被我啜得乾乾淨淨 ﹗連兩塊極品面珠登都全收到我肚裡去，唔好意思喇 ﹗好味道 ﹗

一品脆香燒雞，皮香肉嫩，薄薄外皮脆卜卜。髀肉超級幼嫩，胸肉都好腍唔會鞋，只係雞味好淡，點黑糖豉油都幾好味噃。湯州炒飯，都幾多料喎，似乎食得下，試左先講 ﹗都係偏淡又無鑊氣又濕，麻麻地。干燒伊麵，今次終於合格喇 ﹗雖然都係腍左少少，但味道特濃，當係撈麵都唔錯。