龍門冰室 (已結業)

系港島要搵間平靚正既餐廳真係有難度架，今次系time square後面果條街俾我搵到間平民冰室，價錢夠曬貼地。一入到去聽到好多經典廣東歌，D童年回憶返返曬來～來到冰室點可以唔叫經典鐵板餐？呢到既鐵板餐有好多選擇，岩曬Ｄ食肉獸啊！每個餐會跟湯，西湯夠足料。美式雜扒（豬扒﹑腸仔﹑煙肉﹑煎蛋）($90)大大份鐵板餐，燒汁味道唔錯，豬扒金黃香脆，其他腸仔煙肉都好足料，再加埋意粉食到好飽～爵士西冷扒拼香草腸 ($95)西冷扒唔會太老，冇咩雪藏味，算高質，另外香草腸食得出唔係cheap cheap果隻，幾好味！加埋薯菜勁滿足，而且侍應仲好貼心咁問要唔要茄汁，加分！至於呢到既飲品都幾有特色，我地分別叫左杏仁露同菠蘿冰，前者好濃杏仁味飲落好滋潤夠養生，後者同出面飲既菠蘿冰有Ｄ分別，味道獨特。