香港608冰室 (青山道) (已結業)

香港608店名係根據街道號碼命名，位於青山道608號，尋日朋友建議嚟呢間茶餐廳食晩飯，搵倒地址竟然係7-11便利店，原來隔2個舖位至到。新開的關係，餐廳好光猛，地方濶落，座位唔迫。食物好多選擇，我覺得部分有啲似附近嘅‘瑞士餐廳’，又有啲似‘誰是老闆’選擇有過之而無不及，呢度有好多小菜套餐，炒粉麵飯，碟頭份量夠2位女仕食，下午茶更至7:00 pm。今次點咗下午茶餐魚柳包配沙律餐連熱飲，凍飲要加錢的，此餐可選擇配沙律或薯條，價錢$35.00。魚柳係吉列魚柳，炸得比較燶，有啲過火，而個飽幾好味，入面搽滿牛油，好香，夾少許菜絲，沙律係一般茶餐廳款式，份量好多。餐飲叫咗熱杏霜，但唔夠熱，熱飲必需夠熱度才好飲, 最怕唔溫唔熱，希望餐廳留意及改善一下。水吧及待應們都是後生一輩，非常勤快及熱心工作，一面工作一面互動傾計，雖然有啲大聲及夾少許粗言，但其實明白佢哋工作忙碌，但無掛起黑面，仍勤快醒目，真係好難得，直得讃許。準備起身埋單之際，高瘦男待應已急歩行入收銀處，識得一眼關七，不用客人等待，真醒目，抵讚。