Sense Cafe (已結業)

同朋友去食飯好多時見menu花多眼亂都會直接睇有咩套餐抵玩。佢哋晚餐嘅二人套餐有沙律、熱湯、嘢飲、兩份小食、一份意粉或pizza、仲有個主菜添，另外加份意粉已經夠三個人捧住個肚走！基本上呢間嘢啲嘢食都係正評無伏，就算係湯同沙律都唔會令你覺得係hea貨！特別推薦酒香蒜味濃郁嘅小食青口，雖然唔算大隻但夠哂入味；仲有餅底香脆配有豐富嘅海鮮同千島醬嘅Pizza，好味又唔會太heavy；而個人最推薦係大大隻嘅鹹豬手！以為咁大隻會好易焗到啲肉好乾柴，但完全唔會，豬皮食落香脆之餘仲有啖啖脂香嘅皮下膠質，油香同豬手肉汁嘅組合簡直人間味美！其他嘢食雖然味道中規中矩但絕對無伏！綜合食物、服務態度、環境、價錢等等我覺得係cp值高同值得再訪嘅好店！