麥當勞

營業中

休息中

經過見到門口排長龍，行近啲八卦下，原來係綠茶雪糕。見到啲人一路行一路食，好似好滋味咁，搞到我心郁郁又排埋一份隊。其實加3蚊多條kitkat有啲貴，但係我又未試過綠茶kitkat喎，所以就忍痛嘟左10蚊叫左個有kitkat嘅。說時遲那時快，老麥妹妹以拔刀齋的速度，遞左個甜筒俾我。一拿上手，忽然覺得手感沉實敦厚。原來甜筒紙厚度不菲，同哈記比起來，講厚度的話有過之而無不及。伸脷一瀨，清雅嘅綠茶香氣充滿了鼻腔。張口一咬，濃郁嘅綠茶味充滿了口腔。咕嚕一吞，淡淡嘅綠茶餘韻充滿了喉嚨。因為係軟雪糕，入口即溶，綠茶香氣更加明顯。因為有雪糕，所以kitkat唔會太甜。好好味，但係又唔捨得食太快。當我仲陶醉係個綠茶甜筒嗰陣，唔經唔覺已經食埋最後一啖，但奇怪嘅係...個甜筒殼仍然堅挺，咬落仲脆卜卜！10蚊真係值回票價，但係下次我都係會買7蚊嘅，慳番啲錢。