Bingo & Cook

營業中

休息中

韓國餐廳一向都係香港人至愛，今次嚟到朗豪坊新開嘅Bingo and Cook, 淨係睇裝修擺設已經充滿誠意，絕對有置身首爾之中。再睇睇餐牌，韓國地道小食都包羅萬有，立即先點兩杯韓式凍飲，同埋小食先。凍蜜桃茶同埋青提子碳酸水都非常清新，果味香濃，帶有微微甜味，仲可以開胃醒神；而炸蝦紫菜包飯都即叫即做，金黃香脆嘅大蝦肉身飽滿，連埋紫菜同埋其他配料，感覺豐盛。接連兩個主菜都同樣出色﹐韓國名物生菜包肉震撼登場，五花豬腩肉密鋪喺碟上，肉質包滿，加埋韓國配料及醬汁，放入清新嘅生菜之中，滿足感爆燈。而壓軸就有呢個吸睛搶眼海鮮蔘雞鍋，淨係上檯都要兩個爐預熱，可見份量有幾十足！原隻蔘雞放喺中間，鮑魚、原隻魷魚、蟹、青口、扇貝、蜆肉共冶一爐，試問個湯底仲點會唔吸引？店員仲非常之友善好客，會主動幫手處理食材，呢點更加要加分。