Casa Fina Seafood & Oyster Bar (已結業)

身為蠔魔嘅我對於生蠔嘅喜愛可以話一言難盡， 平時自助餐都起碼食一打生蠔，呢間餐廳嘅生蠔質素非常好，配上白酒簡直係人生樂事。我地點咗三款生蠔，分別來自法國同美國，全部都十分新鮮，法國生蠔仲要有濃厚嘅礦物味，令人一試難忘。生蠔配白酒，香車配美人，新鮮生蠔加上質素好嘅白酒係最強配搭。海鮮方面我地仲叫咗淡水小龍蝦，小龍蝦肉質鮮嫩，比起龍蝦更為彈牙。之後我地仲叫咗小虎蝦沙律，沙律用料十足，起碼有十隻小虎蝦，加上特制醬料，十分開胃。主菜方面就叫咗蟶子意粉同埋燒春雞，意粉爽口微辣，食多幾啖都唔滯，燒雞鮮嫩可口，外皮脆口，配上黑胡椒十分出色。甜品我哋就叫了galeto，檸檬雪糕加曲奇，係我近期食過最出色嘅甜品。