霸嗎拉麵 (德己立街)

營業中

休息中

外籍舞友好多都對蘭桂坊特別感興趣，碰巧九月最後一個週日晚喺該區有新探戈舞會開幕，朝早去完教堂就約咗幾位好飲之徒落老蘭逛一逛，順便指出當晚舞會o既所在地。因深明空肚飲酒極之傷身，四個大男人就走咗入去街口間「霸嗎拉麵」度每人食咗個拉麵打定底。中午時份，小店已九成滿座，中央開放式廚房內o既師傅都忙得團團轉。由於食拉麵真係好快搞掂，AA制又可以各自填寫點菜紙，分開坐都完全冇問題。可能南美國家唔多拉麵店，舞友見到桌上o既自助式餐具、醬油、紙巾、開水都大感新奇。XO仔因有意飯後飲返幾輪，午餐就決定要碗「特盛炙燒豚肉拉麵」，再加多客「羽根燒餃子」。羽根燒餃子（$35/五件）：餃子皮層好夠薄，且一啲都唔油膩，燒咗嗰一邊就好香脆，另一邊則較為柔軟，餡心芳香帶甜，食落又有少少脆脆地，勁啱細佬口味。特盛炙燒豚肉拉麵（$118）：熱辣辣o既拉麵有四大片厚切五花腩，當真開正食肉獸嗰範。五花腩層次分明，軟熟惹味，個人只係略嫌腩片厚咗少少，如果可以每片再開二，相信可更易入口。拉麵幼身o既麵條軟硬適中，湯底香濃甜美，就連配菜o既荀片及青蔥都爽脆可口。吃畢剛好為飯後o既歡樂時光打底，「Kampai, Kampai」！