陳漢記 (已結業)

廿歲已識老闆教頭，以前晚晚打 snooker、落吧劈酒再黎食宵夜，玩得勁開心。間中老闆、粥佬、腸粉佬、煲仔飯阿正，仲有樓面奄仔、阿七、阿肥、阿細，收工拉閘一齊劈酒猜梅到天光七八點，勁癲 ﹗有時又會一齊落酒吧、猜梅、掟飛鏢，非常開心。依家多左好多新面孔，舖位又比以前大左一倍，但依家各散東西了，我都好少黎幫添咯。出品都保持水準，腸粉、粉麵、煲仔食都滿意啦 ﹗ 魚蛋河加腩汁，潮州魚蛋大路既質數，味濃又爽口，合格啦，始終招牌菜唔係魚蛋。牛坑腩撈麵走蔥，都唔知幾多年無黎幫襯喇 ﹗以前無分坑腩唔坑腩，都係牛腩啦。味道同質感比當年進步多倍，好好味 ﹗炆得軟棉又入味，味道真係好香濃，口感鬆化，正噃 ﹗豬潤腸粉，幾十年都係即拉腸粉，新鮮熱辣，米漿調得完美，蒸既火喉又剛好，質感又滑又嫩又棉 ﹗豬潤絲蒸得剛剛好，熱辣辣，爽口又夠滑 ﹗招牌菜即拉腸粉絕對穩陣食得過 ﹗仲有叉腸、牛腸、蝦腸同樣美味 ﹗