美心MX (已結業)

今日約咗師傅嚟整電話，點知個師傅鬼咁晏都唔嚟，後嚟仲話要星期一先可以整，見時間已接近 7 pm, 懶懶地都係費事煮飯，屋企有張美心 $10 coupon, 就行過嚟食晚飯算啦。喺大家樂食扒餐就食得多喇，但從未試過喺美心食，於是就叫咗兩份肉眼牛扒鐵板餐，一份配香煎豬扒，另一份配香煎魚柳，每份 $42, 減咗 $10 優惠券，即係 $74. 件牛扒無大家樂嗰塊咁大咁厚，雖然唔韌，但都無乜肉汁，塊豬扒同魚柳就一般喇，未至於難食嘅，但亦毫無驚喜。個汁竟然一啲黑椒味都無，幸好薯角仍有少少脆口。整個餐份量算少，飲品可選即磨咖啡、汽水或西湯。老公仲話點解實物同牆上宣傳海報內相片相差咁遠嘅？ 點解啲牛扒唔係好似張相咁一格格嘅？ 臨走前有個女店員過嚟執拾枱面，見我地預備離開仲主動同我地講多謝及拜拜，服務質素蠻不錯啊。