The Platter (悦品酒店‧荃灣)

營業中

休息中

最近同朋友試咗呢間荃灣悅品酒店嘅自助餐，第一次食呢間酒店，見佢自助晚餐有龍蝦同生蠔供應，而且價錢亦唔算太貴。餐廳環境乾淨企理，座位又大又闊，四人枱張長梳化食飽瞓喺度都仲得。🦞 海鮮方面有麵包蟹、翡翠螺、蝦、青口、蟹腳、生蠔，而龍蝦係熟食區用芝士焗，當晚全部海鮮都食勻晒，最鍾意當然係龍蝦，雖然每人每次限攞一隻，不過根本都唔洗點排隊，因為廚房出龍蝦出得好快，生蠔亦相當正，無腥味又大隻。🦐 刺身方面有三文魚、墨魚、馬刀貝同貴價嘅阿根廷紅蝦，紅蝦超鮮甜真心無得頂。🍲 熟食方面好多菜式都圍繞着海鮮，例如有豉椒炒蟶子、椒鹽炸蟹、松子魚、蟹鉗伊麵等等，椒鹽炸蟹超級正，食落香脆啖啖肉。🧁 甜品除咗有雪糕外，仲有朱古力噴泉同 DIY 雞蛋仔，小朋友又可以有得玩，整體嚟講都相當滿意，不過酒店為彌補位置上嘅不足，所以有接駁巴提供，而且酒店隔離仲有一個公眾停車場，所以大家都唔需要擔心。