貴緣小鍋米線 (和富)

營業中

休息中

雲南米線舖應該是大部分香港人的平民飯堂，不過實力有高有低，間唔中都會食到啲㐲嘢。不過今次返工經過間米線舖話自己嘅湯底係自家制豬骨湯，唔用濃縮湯精，咁就一於試吓佢實力！今次平民推介嘅係@貴緣小鍋米線位於北角和富薈商場B樓B15-16號舖，舖頭座位闊落舒適，同埋空氣流通冷氣又夠涼，天氣咁熱食嘢要揀個夠冷氣嘅地方都係必須嘅。total有五種唔同嘅湯底選擇，仲有七種唔同嘅辣比食客挑戰。鍾意挑戰食辣嘅，你要試吓佢個特特辣，仲要加錢添🤣👍🏻⭐️青花椒麻辣湯（配菜自行配搭）喺其他地方唔係好常見，我都真心推薦大家試吓， 平時食麻辣食到所有嘢都係一樣嘅味道， 但係青花椒比普通麻辣多了一份香味，配搭埋豬骨湯真係好開胃。佢地嘅魚腐大粒，墨魚丸都幾彈牙而且冇梳打粉味， 腩肉爽口唔會得個肥字。⭐️ 鮮豬骨濃湯（配菜自行配搭）怕食辣嘅朋友可以試吓豬骨湯，湯底鮮甜少油，豬骨味濃郁。滷水豬肚爽口、魚蛋彈牙、薯粉煮得又夠透。⭐️ 蒜香醬油雞翼蒜頭醬油味香濃的冷盤，就好似蒜泥白肉咁樣不過變咗做雞翼， 但係冇咁油膩。⭐️ 榨菜豬肚絲醒腦開胃的小食，豬肚爽口唔會韌，榨菜唔會太鹹。總結：非常之欣賞佢哋嘅湯底鮮甜又少油，食得出真材實料。