雲來軒 (已結業)

好耐無同屋企人食飯啦，老一輩都中意食中菜多D，所以今次就book左呢間名廚餐廳食下。餐廳需要上一層的，上到去唔算話好大，有卡位亦有圓枱，亦有間開房間，我地唔係好多人所以安排坐於位，都幾舒服。座低後侍應就開茶俾我地，同埋送上小食一碟，小食好特別，除左有花生係入面，仲有木瓜片，幾特別。屋企人中意飲湯，所以叫左個湯俾佢飲。日本花菇雞腳燉螺頭，呢個湯係用茶壺裝的，好特別，飲果陣倒落個杯仔到飲，反而更加飲到湯的味道。湯好鮮甜，而且茶壺入面真係有雞腳，好足料。醒胃話梅雞半隻，係網上見到大家都話呢度既話梅雞好食，所以就叫黎試下。雞用左石鍋裝，可以保住雞既溫度。茨汁帶有少少酸味同埋三色椒既味道，所以好香。雞肉好嫩滑，有少少話梅味，酸酸地咁幾特別。水芙蓉蒸明蝦球，呢款菜式係呢度主理既廚師得獎菜，當然要試試佢。佢既蒸蛋係用左蛋白黎蒸，好滑溜，而且女士食唔怕食左蛋黃好肥。蝦球應該有事先整過，所以可以整到蝦肉捲起，好靚。而蝦肉彈牙鮮味，唔怪得枱枱都叫黎食啦。呢度D野食都幾大碟，價錢又唔會因為廚師出名而好貴，值得再黎。