東門冰室 (已結業)

早兩日見到有篇報道，話東門冰室好有能做到明年過年就會結業。都已經有一段時間冇嚟食，所以想喺佢結業之前嚟食多次回味一吓。冰室位於紅磡曲街，即係紅磡殯儀館後面嘅一條橫街。一轉入曲街就會見到一間傳統港式冰室，冇錯就係呢間啦。餐廳牆身地板依然係用緊七十年代嘅花紋瓷磚，加上一部舊式嘅數碼電視，成間冰室都充滿着一種懷舊嘅氣息。本來諗住叫佢嘅招牌章魚餅炒牛麵，可惜當日牛肉賣晒，於是老闆娘就推介章魚餅豬扒福麵。我就要多杯熱檸茶。個麵好快就有得食，豬扒醃得好入味，唔會話好硬，如果要形容個味道嘅話，就好似以前喺外婆屋企嘅嗰種味道，好有家嘅感覺。埋單$39，好平好抵食亦都好有滿足感。