滿園韓國料理 (已結業)

地盤快復工，有咩好食就食埋佢，呢日去到黃埔食韓菜﹗7:30來到，人客不多，地方幾光鮮整潔，擺脫了韓菜的傳統裝修，簡單而舒服，兩個人可以坐對街的窗口位，感覺舒適﹗都費事諗食咩，見有二人餐就點，餐包四個韓式小吃，三種燒肉、加多一個主菜及白飯例湯﹗韓式小吃有蕃薯、白菜仔、芽菜同有大白菜，蕃薯口感軟糯香甜最好吃，大白菜入味夠辣最岩工友﹗白飯是珍珠米，湯是蘿蔔湯，味道清甜而鮮味，不是粉開出來的自家製作，成碗飲哂﹗肉類要了豬牛雞，份量少了點大約每人每樣有兩片左右，牛肉醃得入味滿牛香，豬肉是豬頸肉的質感及味道，爽口鮮甜﹔雞肉比較普通不過也好吃﹗吃韓燒沒有得任食總是覺得有點不夠喉，除了吃不到外，燒的過程也是一種過癮有趣的感受，牛肉可因應自己喜好生一點或熟一點也可以，要試多幾片才可得出最美妙的效果，可惜的是每人每樣得兩片，真的唔係咁夠﹗主菜我們要了個海鮮蔥餅，餅底是上海蔥餅口感的軟餅底，上面再加上蛋漿及大量香蔥大蔥作料，海鮮是墨魚粒及蝦粒，咬落有口感，味道夠哂香口而飽肚，用來送飯很不錯﹗個餐三百，埋單三百三，韓菜貴是必然，不過我地兩個都覺得呢間的質素不錯，係大食唔夠喉了吧﹗