niji KITCHEN (已結業)

比起開業既時候，人流少左好多，而家唔使等位直接入座。店舖寬敝舒適，座位間都隔得遠，但要自己Serve自己，於收銀處買飛仔，自己搵位，等叫號取餐，係快餐店既運作模式。叫左個牛肉配蛋包飯伴和風咖哩汁，可跟餐或者散叫，個蛋包飯亦可轉其他汁，跟餐有前菜同幾款生果汽水選擇。蛋包飯外貌同味道正常，牛肉夠淋身，而份量足夠，但無蛋香味，咖哩汁亦無特別(雖知日式咖哩飯既咖哩汁先係精髓所在)。驚喜位反而係個湯，湯味好香，雞肉亦好滑喎！知道佢有聘請聽障人士，屬於良心企業，呢點都要大力支持！