SP Senses (尖沙咀中心) (裝修中)

同朋友喺尖沙咀行街，見到有間粉紅色餐廳幾特別，就行咗過去睇吓。餐廳有好多花、植物做裝飾，環境幾闊落、優雅，就諗住試吓。午餐都幾多選擇，揀咗麻油淮山天然雞肉丼 $142，連湯加飲品。是日濃湯係蘑菇湯，估唔到有驚喜。細細杯，不過足料，重菇味，每啖都食到蘑菇碎。之後到主菜。主菜好大一碗，入面有雞件、淮山、紅棗、冬菇。湯頭比想像中濃郁，味道層次豐富，有麻油味得嚟唔會油膩，好啱配飯。雞件份量足，淮山夠淋入味，推薦。朋友叫咗香煎鱸魚喇沙扁意粉 $152，連湯加飲品。鱸魚魚皮香脆，肉質厚實彈牙，份量多。意粉咸香微辣，有喇沙味，唔錯。總括嚟講，餐廳菜式選擇多，味道同價錢成正比。環境舒適，坐得舒服，啱想食健康啲、一家人或者幾個女仔傾偈食飯。