鮮入圍煮花膠雞海鮮火鍋

營業中

休息中

今日約咗個朋友去鮮入圍煮食個足料花膠雞湯火鍋。入面環境寬敞，最重要係冷氣抽風做得好好，所以就算外面高達38度高溫，都可以暢快咁打邊爐。店內仲有大魚缸，仲可以揀生猛海鮮做火鍋配料。調味盤有齊打邊爐必要嘅調味，不過我想講，有鮮味嘅雞湯已經唔再需要點任何調味。揀咗濃厚原隻雞煲花膠湯，湯底嘅顏色已經話你知佢有幾真材實料。我哋得兩個人，所以揀咗細份有半隻雞。店員會喺客人面前將原隻雞分成雞件，服務細心。湯底入面佈滿咗花膠，夠晒滋潤養顏。飲湯食雞食花膠已經半飽，所以今次冇揀太多嘅火鍋配料，其中花膠鮮蝦丸總共有六粒。蝦丸内加有花膠，當堂名貴好多。稻庭烏冬係急凍彈牙款式，叫一個兩份share分甘同味。