茶木‧台式休閒餐廳 (屯門市廣場1期)

營業中

休息中

肥雞一直都幾欣賞茶木，因為佢嘅menu唔會悶，每季都會出當季當造嘅食品，令到食客可以嘗鮮。位於屯門市廣場嘅茶木，肥雞又真係第一次試，今次試咗佢嘅古早紅燒牛肉拌麵，湯麵就食得多， 佢嘅紅燒牛肉湯底永遠都係肥雞頭三甲之一，反而拌麵就幾得意肥雞第一次試。佢嘅牛肉唔使講滷得非常之入味同埋淋，入口即化，但係佢嘅拌麵嘅調味今次多咗麻嘅感覺，應該有落到花椒油，所以食落去好香口。至於佢個墨汁花枝奶油意大利粉 ，佢嘅墨魚汁非常之咸香，配埋q彈嘅花枝，唔錯。甜品嗌咗佢新出嘅青蘋果牛油果蜜糖磚，一如以往，多士烤得非常之香脆 ，配上甜甜嘅青蘋果忌廉同埋牛油果嘅油香，係一個幾有趣嘅嘗試。至於佢嘅脆脆黑糖瀑布珍珠奶茶，上面配埋煙韌嘅丸子，但係杯嘢又唔係好甜， 肥雞幾鍾意。