HIKARI

今日冋朋友去左荃灣呢間Hikari cafe食晚餐店內空間雖然唔算大, 但座位尚算寬敞, 如果想打卡影靚相既話可以選擇坐bar枱。主食方面我地叫左波士頓龍蝦肉芝士忌廉蝴蝶粉同埋慢煮美國安格斯牛板腱飯。龍蝦蝴蝶粉賣相精緻吸引, 龍蝦肉細緻鮮甜, 但龍蝦肉份量個人嫌少左啲。 而蝴蝶粉就口感彈牙, 唔會太淋, 每一粒都沾滿醬汁, 而醬汁亦帶芝士味, 同蝴蝶粉非常夾, 有種令人想繼續追吃既感覺。慢煮牛板腱飯賣相同樣一流, 牛肉份量好足, 未食已經可以先加分。牛肉生熟程度控制得好好, 肉呈粉紅色, 肉質細膩嫩滑, 唯一缺點是個人覺得味道淡左少少, 但好彩的是飯的醬汁較濃厚可以補救, 飯的配菜有萵荀, 令口感層次更豐富。另外, 我地都試左兩杯飯品, 分別是香園焙茶鮮奶同丸久尔山園抹茶鮮奶。 兩杯同樣入口順滑, 帶淡淡焙茶同抹茶的奶香, 味道不算濃郁, 比較適合口味無咁重的朋友。