牛響度麵館 (Aeon Style)

營業中

休息中

食Foodcourt，總係可以有方法令自己成為焦點。今次喺黃埔Aeon嘅”牛響度麵館”，我哋叫到隔離左右都望住😎 (我哋已經叫全走少咗好多顏色)。首先係”沙茶牛三寶(伴刀削麵)”。個人推介食刀削麵，望落都豪華啲！所謂牛三寶，就係金錢肚/牛筋/滷牛面頰。三樣嘢都炆得好腍，襯埋招牌蔥油，撈到非常入味。跟住就係”惹味豬頸肉”刀削麵配胡麻醬。同樣地高水準，豬頸肉脆到好似炸過咁，個人就覺得配招牌蔥油好過胡麻醬🙂。叫咗個小食，慢煮手撕雞，諗住點綴吓，結果出到嚟成座山咁，多到食唔晒😂。仲有，呢度無論係撈麵定手撕雞，啲青瓜都好似唔使錢咁大堆大堆咁上。講埋嘢飲，如果唔鍾意甜，洛神花茶係OK嘅，不過會有啲酸。反而白桃花茶就非常出色，少少甜茶底極香，加少少白桃味，解渴又得，解辣又得。最後食唔晒，都只係200有找。餐廳係喺food court最入，有時門面會冇人，但只要敲鐘，入面啲阿姐就會即刻出嚟招呼。