The Tomato Story (已結業)

盛夏天氣又熱又焗，仲要間中嘅過雲雨實在令人無心機，更無胃口。呢個時候好就係食返啲酸甜開胃嘅食物，放工經同事帶路，黎到呢間以蕃茄做主題，全天然無額外添加嘅餐廳，品嚐一下用60斤鮮蕃茄及蔬菜熬煮嘅茄湯。經典蕃茄牛肋肉長通粉。無額外添加嘅蕃醬果真更清爽，味道唔會過甜或過酸。牛肋肉慢煮而成，入味之餘咬落毫不費力，兩者味道一向都係咁夾。而杜蘭通粉食落煙韌帶麥香，混和蕃茄醬之後十分好味。鋪面嘅荷蘭小蕃茄飽滿多汁，入口爽甜令人印象深刻。蕃茄龍蝦汁野菌天使麵。有別於一般紅噹噹嘅龍蝦汁，原來係熬煮醬汁時無落任何茄膏調色調味，所以顏色偏淡黃但仍味道濃郁。醬汁稀稠度啱啱好，掛滿到每條麵條上面。荷蘭小蕃茄繼續清甜爽口，雖然食到尾先發覺係寛條麵，但厚身麵條更同龍蝦汁配夾。蕃茄特厚切豬扒焗飯。豬扒同樣用慢煮製作，咬落鬆軟。焗飯同樣以蕃茄湯煨煮，所以入口除咗飯香更有濃濃蕃茄香味。有時街外食嘅焗飯會覺得過酸，但呢個就酸甜適中，配上焦香芝士，真係零舍好味。整體茄味十足，因為標榜純蕃茄熬製所以食落都唔使就住就住，無添加更健康。 飯後行經太古商場份外感觸，但知道現階段未可以放鬆。路仍然很長但只要港人團結一定會見到雨後陽光。