燉 (已結業)

香港人鍾意飲老火湯，呢間燉湯店起正荔枝角港鐵站出口隔離，容易搵，而且湯水選擇都幾多，都係滋補款，男女老少都啱飲，有時行開附近都會特登過嚟飲啖湯，個人最欣賞佢個天麻川芎白芷燉魚頭湯。呢間勝在價錢親民，出貨快唔使點等，湯水無味精(所以會偏淡，可以問店員攞啲鹽)，店面整體都算衛生嘅(佢荔枝角店係外賣自助式，所以有時會出現啲嘢食完冇人收，積咗起張枱度嘅畫面)。如果對湯水冇太大興趣，佢都有糖水，蒸飯，中式小食可以試吓嘅，甜品個人推薦花膠燉鮮奶; 小食嘅佢個蒸白鱔都唔錯，幾鮮甜，不過好似係時令，唔係成日有。另外，好多人都知呢間店係某個TVB藝人開㗎啦，如果有心想見吓藝人，聽講佢周不時會親自起店面服務，見過佢親自收銀，抹枱，收垃圾同跟單，對啲客人嘅合照要求有求必應，又會同客人講多謝支持，幾貼地。我起佢間鋪見過佢2次，2次都係週五傍晚。