麒藝館 (已結業)

XO仔手持數張時代廣場嘅餐飲現金券，所以就豪氣地約同幾位長輩去幫襯商場內一家貴價啲嘅「麒藝館」。店子準六時開門，正門左方可見金漆字句寫出「天下第一豬」，明顯係招牌菜，咁梗係要試吓啦！於接待處安心量度體溫時，發現原來用指定匯豐卡找數可即享八五折，精明嘅消費者一算已計到此優惠分分鐘抵過用手上僅有嘅$200禮券，不過最實際都係等埋單時見機行事。用餐大堂嘅散座分隔得都幾開，空間感十分足。中菜廳樓底高高，雖並無花巧之裝潢，但勝在格調高雅。六人被安排入座內廳其中一張大枱，長輩都大讚闊落舒適。餐桌上擺有齊備嘅自用及公用餐具，衛生企理。茗茶每位$20，一頁靚茶選擇甚有貴氣。細看十多頁厚本餐牌時，留意到香檳、紅酒、白酒嘅開瓶費為$200/枝，高級餐廳黎講真係算好有良心喎。服務生友善客套，落單時除咗推介招牌菜之外，因深知部份菜式如「金沙黃金蝦窩巴」一客只有四件，更主動提出可安排廚房加夠六人份量，當真細心周到。即燒無花菓天下第一豬（$348/例）：招牌菜天下第一豬例牌共有六件，富光澤嘅燒豬皮香脆鬆化，皮下脂肪唔多，豬肉軟潤甜美，肉汁豐腴，相信當中嘅果香甜味正正源自餸名中嘅「無花菓」，天下第一豬果真名不虛傳！