橋底辣蟹 (駱克道) (已結業)

橋底辣蟹都幾巴閉，係近距離都敢開幾家分店，如果唔係D嘢夠梗就係老細癡咗線喇，不過擺明人地唔係傻嘅喇。首先覺得瀨尿蝦正，二百幾一隻，不過夠曬大隻夠曬新鮮夠入味，正吖！直接叫咗兩隻，四個人食都仲意猶未盡吖，不過仲點咗其他嘢再叫就食唔落喇！橋底辣蟹都唔錯，作為招牌菜，蟹雖然係中等大嘅不過都幾有分量，我係好鐘意蒜頭嘅，呢道菜啱啱係我杯茶吖，成隻蟹都比D蒜頭埋住咗，蒜頭嘅香同埋蟹嘅鮮嫩真係好搭配！蟹腳都算多肉，好夠味！配啤酒爽！仲有花蛤都幾好，肉唔算多，不過夠有味，吮吮殼都幾好味。蒸扇貝唔錯，扇貝好大好新鮮，海鮮最緊要新鮮喇，只要材料新鮮隨便煮下都好食，何況呢度大廚廚藝不錯，扇貝好嫩好有料，唔錯！不過覺得價錢都幾貴吓。